m u s i c a

Pre-testo

Scrivo perché
per la telepatia
è ancora presto.

Snetando i sgiansi de pisso so’l cesso

Stamatina, col sol de’a bèa stagion,
pensavo che ‘a scritura (‘a poesia)
forse ‘a xé come un far domande a ‘a lingua
(ànsi: a nialtri, atraverso ‘l so’ vero) –
‘sto mar che crésse e càea co’a marea
de’i eventi e de’a zénte che ghe vive,
‘sta sorta de creatura che se move
co’ nialtri e ne mostra robe nove,
ma cussì nostre che ‘e tegnemo sconte
o insepàe pa’i cantoni de’a storia:
un caréto de civiltà passada
che va da calche parte, nel futuro
e ne dà sachetoni che ne scròea
de dosso ‘l polvaron che ne inscarpìa,
ogni volta che ghe vardemo drento
so ch’él oràcoeo de predission
che gnanca no’ savemo de ‘ver perso;
scrìvar, insoma, par che ghe soméja
a un ato de magìa: xé domandar
a tuto l’universo, a mèzo l’omo,
‘na risposta pa’a situassion presente –
‘na diression, un senso: che va ben
pi’ in là de chi che vèrze, in ch’él momento,
‘a boca o move a man – pa’ ‘ndar in sérca
de quéo che ghémo zà, ma no catémo:
far poesia xé un ciaro che impissémo
tanto drento nialtri che par fora –
cussì da védarghe mèjo in t’él scuro
dove che, orba, se incaìga l’ànema.

(21.3.09)

Postato da: situo a 19:14 | link | commenti (1) |

Per le sorrise parolette brevi (Dante)

Postato da: situo a 16:37 | link | commenti (2) |